اسلام آباد۔14مارچ (اے پی پی) پاکستان قابض اسرائیلی فوج ولوں غزہ دی عوام تے جاری مظالم تے تشویش کریندیں ہوئیں جنوبی غزہ اچ رفح دے مشرقی حصے اچ فلسطینی پناہ گزیناں کیتے اقوام متحدہ دی ریلیف اینڈ ورکس ایجنسی (یو این آر ڈبلیو اے) دے خوراک دی تقسیم دے مرکز تے حملے دی مذمت کیتی اے۔ دفتر خارجہ دی ترجمان ممتاز زہرہ بلوچ خمیس کوں جاری پریس بریفنگ اچ آکھیا جو قحط اچ آبادی کیتے خوراک دی تقسیم دے کجھ باقی مراکز تے حملہ اسرائیل دی فلسطینیاں کوں وݙے پیمانے تے فاقہ کشی نال ݙوچار کرݨ دی غیر انسانی پالیسی دا حصہ اے۔ ترجمان دفتر خارجہ آکھیا جو اساں اقوام متحدہ دی سلامتی کونسل توں مطالبہ کریندوں جو او فلسطینی عوام دے خلاف قابض حکام دے انہاں جرائم دا خاتمہ کرے اتے اقوام متحدہ دے چارٹر دے تحت فلسطینی عوام دی تکالیف دا خاتمہ کرݨ کیتے آپݨی ذمہ واریاں پوری کرے۔
