اسلام آباد۔2مارچ (اے پی پی):صدر مملکت ڈاکٹر عارف علوی ملک اچ صنعتی ترقی کیتے انکم ٹیکس ترمیمی آرڈیننس 2022 ء جاری کر ݙتا، آرڈیننس دا مقصد ملک اچ سرمایہ کاری اتے صنعتاں دا ودھارا، بیمار صنعتی یونٹس دا احیاء اے۔بدھ کوں ایوان صدر دے پریس ونگ توں جاری بیان موجب آرڈیننس دے تحت نقصان اچ ونڄݨ آلی بیمار صنعتاں کوں ول زندہ کرݨ کیتے پیکیج ݙتا ڳئے ۔ آرڈیننس دی مدد توں انکم ٹیکس آرڈیننس 2001 ء اچ سیکشن 59 سی ، 65 ایچ ، 100 ایف دا ودھارا کیتا ڳئے۔ آرڈیننس اچ مزید آکھیا ڳئے جو نویاں صنعتاں دے قیام کیتے ظاہر کیتے ڳئے اثاثیں تے سرمایہ کاراں کوں صرف 5 فیصد مقرر ٹیکس ݙیوݨا ہوسی ، ظاہر کیتے ڳئے فنڈز صرف پلانٹ و مشینری مل گھنݨ ، انڈسٹری دے قیام کیتے استعمال تھی سڳسن ، فیدہ مند کمپنیاں بیمار اتے ضیان اچ ونڄݨ آلیاں صنعتاں حاصل کر سڳسن ، حوصلہ افزائی کیتے بیمار صنعت دا ٹیکس ضیان اڳلے ترائے سال کیتے ایڈجسٹ کیتا ونڄ سڳسی ، اہل سمندر پار پاکستانی ، ٻاہرلے ملک اثاثیں دے حامل پاکستانی سرمایہ کاری کر سڳسن، سرمایہ کار پیکج د تحت واپس گھن آئی ڳئی رقم تے 100 فیصد ٹیکس کریڈٹ دے اہل ہوسن ، پیکج دے تحت واپس گھن آئی ڳئی رقم دے برابر ٹیکس کریڈٹ صرف پنج سال تئیں ݙتا ویسی ۔صدر مملکت وزیر اعظم دی ایڈوائس تے آئین دے آرٹیکل 89 دے تحت آرڈیننس جاری کیتے۔
