کاشغر20ستمبر(اے پی پی) صدر مملکت آصف علی زرداری کاشغر دی تاریخی عیدگاہ مسجد دا دورہ کیتا جیڑھی خطے دے مشہور مذہبی تے ثقافتی مقامات وچوں ہک اے۔ ایوان صدر دے پریس ونگ توں ہفتے کوں جاری بیان موجب صدر مملکت دا اے دورہ پاکستان تے چین وچال ثقافتی افہام و تفہیم کوں ودھارا ݙیوݨ تے ݙوطرفہ تعلقات کوں مضبوط بݨاوݨ وچ ودھدے تعاون دی عکاسی کریندے۔ کاشغر دی کمیونسٹ پارٹی دے سیکرٹری یاؤننگ تے امام میمتی جوبن صدر آصف علی زرداری دا مسجد پُڄݨ تے پرتپاک استقبال کیتا۔ امام صدر مملکت کوں مسجد دا دورہ کرایا۔ صدر کوں مسجد دی تاریخی اہمیت تے ورثے تے بریفنگ وی ݙتی ڳئی۔ دورے دے دوران صدر مملکت عصر دی نماز ادا کیتی تے مسجد دے شاندار فن تعمیر دی تعریف کیتی ۔ صدر مملکت دا دورہ پاکستان تے چین وچال پائیدار دوستی کوں مستحکم کرݨ وچ ہک ٻئے قدم دی نشاندہی کریندے۔ ڈوہیں ملک اپݨے تاریخی تعلقات کوں مزید گھاٹا کرݨ تے امن، استحکام تے خوشحالی دے مشترکہ اہداف کوں اڳوں گھن ونڄݨ کیتے پرعزم ہن۔ سینیٹر سلیم مانڈوی والا تے ڈوہیں ملکاں دے سفراء وی صدر مملکت دے رلے ہن۔
