اسلام آباد۔27ستمبر(اے پی پی) صدر مملکت آصف علی زرداری آکھیے جو پاکستان اڄوکے سالاں اچ سیاحت دی ترقی اچ قابل ذکر پیشرفت کیتی اے، حیرت انگیز قدرتی حسن، شاندار ثقافتی ورثے اتے پرتپاک مہمان نوازی نال بھرپور پاکستان ہک منفرد مقام رکھیندے، قراقرم اتے ہمالیہ دیاں اُچیاں چوٹیاں توں گھن تے سندھ و بلوچستان دے ساحلاں تئیں، موہنجو داڑو، مہرگڑھ، ہڑپہ اتے ٹیکسلا دی ثقافتی دولت توں گھن تے جدید شہراں تئیں اساݙا ملک پائیدار سیاحت دا مرکز بݨݨ دی زبردست صلاحیت رکھیندے ، اساں سیاحت دی ترقی کوں اقوام متحدہ دے پائیدار ترقیاتی اہداف (ایس ڈی جیز) دے نال ہم آہنگ کرݨ کیتے پرعزم ہیسے اتے پائیدار سیاحت دیاں پالیسیاں تے فعال طور تے کم کریندے پیوں ۔ایوان صدر دے پریس ونگ توں جاری بیان موجب یوم سیاحت دے موقع تے آپݨے پیغام اچ صدر مملکت آصف علی زرداری آکھیا جو اڄ 27 ستمبر جݙاں جو اساں عالمی برادری دے نال رل تے یوم سیاحت 2025 منیندے پیوں تاں اساں ایں سال دے موضوع “سیاحت اتے پائیدار تبدیلی” کوں اپنیندوں، اے موضوع اساکوں ایں ڳالھ تے غور کرݨ دی دعوت ݙیندے جو دنیا دے ساریں توں وݙے اقتصادی شعبیں اچوں ہک ہووݨ دے ناطے خاص طور تے موسمیاتی تبدیلی اتے ودھدی ہوئی سماجی و معاشی عدم مساوات دے موجودہ دور اچ سیاحت مثبت تبدیلی دا ذریعہ کیویں بݨ سڳدی اے۔صدر مملکت آکھیا جو حیرت انگیز قدرتی حسن، شاندار ثقافتی ورثے اتے بھرپور مہمان نوازی نال بھرپور پاکستان ہک وکھرے موڑ تے کھڑے، قراقرم اتے ہمالیہ دیاں اُچیاں چوٹیاں توں گھن تے سندھ و بلوچستان دے ساحلاں تئیں، موہنجو داڑو، مہرگڑھ، ہڑپہ اتے ٹیکسلا دی ثقافتی دولت توں گھن تے جدید شہراں تئیں اساݙا ملک پائیدار سیاحت دا مرکز بݨݨ دی زبردست صلاحیت رکھیندے۔ انہاں آکھیا جو اساکوں انہاں چیلنجز دا وی اعتراف کرݨا چاہیدے جو اساݙی ترقی اچ رکاوٹ ہن۔ صدرمملکت آصف علی زرداری آکھیے جو اڄوکے سالاں اچ پاکستان سیاحت دی ترقی اچ قابل ذکر پیشرفت کیتی اے، سیاحواں دی مقامی اتے بین الاقوامی دلچسپی اچ خاص طور تے مہم جوئی، مذہبی اتے ثقافتی سیاحت دے شعبیں اچ نمایاں وادھا تھئے ناکافی بنیادی ڈھانچہ، ماحولیاتی انحطاط، پالیسیاں تے عملدرآمد اچ عدم استحکام اتے مقامی کمیونٹیز دی شمولیت دی کمی جیھے مسئلے ہݨ وی اہم رکاوٹاں ہن۔ صدر آصف علی زرداری آکھیا جو خاص طور تے موسمیاتی تبدیلی ہک ودھدا خطرہ اے۔ گلیشیئرز دا پگھلݨ، پاݨی دی کمی اتے موسمی شدت نہ صرف اساݙے ماحولیاتی نظام بلکہ اساݙے ثقافتی اتے تاریخی جہیں کیتے وی خطرہ ہن، جے سیاحت کوں پائیدار تبدیلی دا ذریعہ بݨاوݨا اے تاں ماحولیاتی تحفظ کوں ایں دی بنیاد ہووݨا چاہیدے۔انہاں آکھیا جو موسمیاتی تبدیلیاں دے خلاف مزاحم بنیادی ڈھانچے دی تعمیر، ماحول تے گھٹ اثر آلی سیاحت دی حوصلہ افزائی اتے حیاتیاتی تنوع دا تحفظ اساکوں آپݨی قومی ترجیح بݨاوݨی ہوسی، ایں ویلھے حکمت عملی نال سوچ اتے اجتماعی عزم دی لوڑھ اے۔ صدر مملکت آکھیا جو پائیدار سیاحت اچ سرمایہ کاری دے ذریعے اساں کنے مقامی معیشتاں کوں تکڑا کرݨ، خاص طور تے دیہاتی اتے پسماندہ علاقیں اچ جامع روزگار دے موقع پیدا کرݨ اتے نینگراں اتے تریمتاں کوں بااختیار بݨاوݨ دا موقع اے، ذمہ دارانہ طور تے منظم کیتی ڳئی سیاحت ثقافتی سمجھ ٻجھ، امن دے ودھارے اتے آوݨ آلیاں نسلاں کیتے اساݙے قدرتی و ثقافتی ورثے دے تحفظ دا سبب بݨ سڳدی اے۔صدر مملکت آکھیا جو پاکستان دی حکومت سیاحت دی ترقی کوں اقوام متحدہ دے پائیدار ترقیاتی اہداف (ایس ڈی جیز) دے نال ہم آہنگ کرݨ کیتے پرعزم اے اتے پائیدار سیاحت دیاں پالیسیاں تے فعال طور تے کم کریندی پئی اے۔ سیاحت نال جُڑئے کاروباراں کیتے گرین سرٹیفیکیشن کوں اپناوݨ اتے کمیونٹی تے مبنی اتے ماحول دوست سیاحت کوں ودھارا ݙیوݨ کیتے آپݨی حکمت عملیاں کوں جوڑݨ اہم اہداف ہن لیکن حکومت کلھیں اے خواب پورا نی کر سڳدی، پرائیویٹ سیکٹر، سول سوسائٹی، مقامی کمیونٹیز اتے خاص طور تے اساݙے نینگراں کوں پاکستان کوں پائیدار سیاحت دے مرکز اچ بدلݨ دے عمل اچ فعال شراکت دار بݨݨا چاہیدے۔ صدر مملکت آصف علی زرداری آکھیا جو آؤ، رل تے ایں مستقبل دی ول کم کروں جتھاں پاکستان اچ سیاحت معیار زندگی کوں اُچا کرے، اساݙے سیارے دا تحفظ کرے اتے پاکستان دی بہترین تصویر بطور عالمی معیار دی سیاحتی منزل دنیا دے سامݨے پیش کرے
