اسلام آباد۔5 اکتوبر (اے پی پی) عرب تے اسلامی ملکاں دے وزرائے خارجہ غزہ وچ جامع تے پائیدار جنگ بندی کیتے تازہ پیش رفت دا خیر مقدم کریندے آکھیے جو اے پیش رفت غزہ دے عوام کوں درپیش سنگین انسانی صورت حال دے حل کیتے ہک حقیقی موقع ݙیندی اے۔ اردن، متحدہ عرب امارات، انڈونیشیا، پاکستان، ترکیہ، سعودی عرب، قطر تے مصر دے وزرائے خارجہ اپݨے سانجھے بیان وچ اڄ حماس دی طرفوں غزہ وچ جنگ مکاوݨ، سارے یرغمالیاں دی رہائی تے نفاذ دے طریقہ کار تے مذاکرات دے وقتی آغاز دی امریکی صدر ڈونلڈ ٹرمپ دی تجویز نال تعلق رکھݨ آلے چاتے ڳئے اقدامات دا خیر مقدم کیتے۔ وزرائے خارجہ امریکی صدر ٹرمپ دی ایں اپیل دا وی خیر مقدم کیتا جو اسرائیل بمباری وقتی بند کرے تے تبادلے دے معاہدے تے عمل درآمد دا آغاز کرے۔ انہاں خطے وچ قیام امن کیتے صدر ٹرمپ دے عزم دی وی تحسین کیتی تے ایں پیشرفت کوں ہک جامع تے پائیدار جنگ بندی دے حصول کیتے حقیقی موقع قرار ݙتا جیڑھا غزہ دے عوام کوں درپیش سنگین انسانی بحران دے حل وچ مددگار ثابت تھی سڳدے۔ پاکستان دے دفتر خارجہ توں جاری بیان موجب وزرائے خارجہ حماس دے ایں اعلان دا وی خیر مقدم کیتا جو او غزہ دا انتظام ہک عبوری فلسطینی انتظامی کمیٹی جیندے وچ غیر جانب دار ٹیکنوکریٹس شامل ہوون، دے حوالے کرݨ کیتے تیار اے۔ انہاں زور ݙتا جو ایں تجویز تے عمل درآمد دے طریقہ کار تے ایندے دے سارے پہلواں تے اتفاق رائے کیتے مذاکرات وقتی شروع کیتے ونڄن۔ وزرائے خارجہ اپݨے مشترکہ عزم دا اعادہ کیتا جو او ایں تجویز تے عمل درآمد، غزہ تے جاری جنگ دے وقتی خاتمے تے ہک جامع معاہدے کیتے کوششاں جاری رکھیسن جیڑھا غزہ وچ انسانی امداد دی بلا رکاوٹ فراہمی، فلسطینی عوام دے جبری انخلا روکݨ ، شہریاں دے تحفظ، یرغمالیاں دی رہائی، فلسطینی اتھارٹی دی غزہ وچ واپسی، غزہ تے مغربی کنارے دے اتحاد، سارے فریقاں دی سلامتی کیتے ہک مؤثر سکیورٹی نظام، اسرائیلی افواج دے مکمل انخلا تے غزہ دی تعمیر نو دے ذریعے ݙو ریاستی حل تے مبنی منصفانہ امن دے قیام دا رستہ ہموار کریسی۔
.jpg)
