اے پی پی میگا کرپشن کیس، 13 بندیاں دی ضمانت قبل از گرفتاری دی درخواست خارج، ایف آئی اے 7 بندیاں کوں عدالت دے نیڑے توں گرفتار کر گھدا

اسلام آباد۔16ستمبر (اے پی پی) سپیشل جج سنٹرل ہمایوں دلاور اے پی پی میگا کرپشن کیس اچ اہم فیصلہ سݨیندیں ہوئیں 13 بندیاں دی ضمانت قبل از گرفتاری دی درخواست خارج کر ݙتی اتے بندیاں کوں گرفتار کرݨ دے حکم جاری کر ݙتے، ایف آئی اے 7 بندیاں کوں عدالت دے نیڑے توں گرفتار کر گھدا. منگل کوں سپیشل جج سنٹرل ہمایوں دلاور دی عدالت اچ مقدمے دے نامزد بندے فرقان راؤ، معظم جاوید کھوکھر، ارشد مجید چوہدری، محمد غواث، اظہر فاروق، اعجاز مقبول، ثاقب کلیم، خرم شہزاد، ادریس احمد، شاہد لطیف، غلام مرتضیٰ، طاہر گھمن، ساجد علی، عمران منیر اتے عدنان اکرم باجوہ ولوں ضمانت قبل از گرفتاری دی درخواستاں تے سماعت تھئی. سماعت دے دوران بندیاں دی حاضری لاتی ڳئی. ایف آئی اے عدالت کوں ݙسایا جو شفاف تحقیقات دے بعد مقدمہ درج کیتا ڳئے اتے ساریاں بندیاں دے خلاف پکے ثبوت موجود ہن. ایف آئی اے دے مطابق ٻہت سارے بندیاں دے اکاؤنٹس اچ ناجائز طور تے رقم منتقل تھئی اے، جئیں کوں وصول کرݨا ضروری ے۔ ٻئے ݙسایا جو بندیاں پراویڈنٹ فنڈ اتے سیلری اکاؤنٹس توں رقم کڈھائی۔ ایف آئی اے دے اسسٹنٹ ڈائریکٹر (لیگل) خوشنود بھٹی عدالت کوں ݙسایا جو بندے تنخواہ وی ڳھندے رہے اتے پنشن وی وصول کریندے رہیے. بندیاں دا طریقہ اے ہا جو او پنشن شیٹ اچ آپݨا ناں وی شامل کر ݙیندے ہن اتے جݙاں پنشن جاری تھیندی ہئی تاں رقم آپݨے اکاؤنٹس اچ منتقل کر ݙیندے ہن. انہاں ݙسایا جو پراویڈنٹ فنڈ ملازمین دی تنخواہ توں کٹدے جیہڑا ادارہ دے کول اوہناں دی امانت ہوندی اے، بندے پراویڈنٹ فنڈ دی رقم ہالی ڈے ان ہوٹل اچ واقع بنک دے اکاؤنٹ اچ منتقل کریندے ہن اتے اوتھوں کیش دی صورت اچ کڈھوا ݙیندے ہن اتے ٻئے اکاؤنٹس اچ منتقل کر ݙیندے ہن. انہاں ݙسایا جو ارشد مجید چوہدری 2021 توں 2024 تئیں ڈی ڈی او رہیا، ایں وچال انہاں آپݨے اکاؤنٹ اچ 6 کروڑ 61 لکھ روپے منتقل کیتے جڈانجو 18 کروڑ اتے 24 کروڑ دے چیکس انہاں دے دستخط نال بنک توں کیش کرا ݙتے۔ ایف آئی اے عدالت کوں ݙسایا جو ملزم اظہر فاروق، جہڑا کیشیئر ہا اتے ساریاں پیسے بنک اچ آپ کڈھواوݨ اچ ملوث اے، اظہر فاروق دے ذاتی اکاؤنٹ اچ 8 کروڑ روپے منتقل کیتے ڳئن. ایف آئی اے ݙسایا جو عدنان اکرم باجوہ، جہڑا اے پی پی دا سابق ایگزیکٹو ڈائریکٹر (ای ڈی) رہیا، مالی معاملیاں دے ووچرز تے انہاں دے تصدیق شدہ دستخط موجود ہن. انہاں ای ڈی دی حیثیت نال ٻہت سارے ووچرز اتے چیکس تے ناجائز دستخط کیتے ہن. انہاں ݙسایا جو غواث خان وی ای ڈی دی حیثیت نال 7 کروڑ روپے دا چیک جہڑا تنخواہ دی مد اچ تیار کیتا ڳیا ہا، ایں تے دستخط کیتے جڈانجو ادارہ دے ملازمین دی اوں ویلھے تنخواہ صرف 3 کروڑ روپے ٻݨدی ہئی، 4 کروڑ روپے ودھ دے ناجائز طریقے نال منتقل کیتے ڳئن. ایف آئی اے عدالت کوں ݙسایا جو ادریس چوہدری اتے طاہر گھمن ݙوہیں آڈٹ انچارج رہین، انہاں دی ذمے واری ہئی جو ہر مہینے آڈٹ رپورٹ تیار کریندے، انہاں دے ویلھے اچ ہک ملزم کوں 90 لکھ روپے تنخواہ ݙتی ڳئی جیندا انہاں کوئی آڈٹ نئی کیتا جئیں نال انہاں دی بدنیتی ثابت تھیندی اے. ایف آئی اے دے تفتیشی آفیسر محمد جنید عدالت کوں ݙسایا جو ملزم ثاقب کلیم دے اکاؤنٹ اچ 61 ہزار روپے توں ودھ رقم پنشن دے اکاؤنٹ توں ٹرانسفر تھئی. ایف آئی اے ݙسایا جو ملزم عمران منیر پی ایف سیکشن دا انچارج ہا، انہاں پی ایف اکاؤنٹس توں 5 کروڑ روپے دی رقم ہالی ڈے ان بنک برانچ اچ جمع کرائی اتے ولا اوتھوں ترائے انڄ انڄ چیکس دے ذریعے مذکورہ رقم کڈھوائی ڳئی. انہاں ݙسایا جو تقریباً 21 کروڑ روپے دے چیکس ہالی ڈے ان بنک برانچ توں کیش کرائے ڳئن جئیں بارے ڈیپارٹمنٹل انکوائری کیتی ڳئی اے. انہاں ݙسایا جو ملزم عمران منیر 2 کروڑ 84 لکھ روپے دے ترائے چیکس مجاز اتھارٹی دی منظوری دے بغیر ٹرانسفر کیتے ہن. انہاں ݙسایا جو ملزم اعجاز مقبول ݙو چیکس اوں ویلھے دے منیجنگ ڈائریکٹر (ایم ڈی) دے ناں تے وصول کیتے جئیں تے اساں تحقیقات اتے ریکارڈ توں اے معلوم کیتے جو کہیں ایم ڈی نہ انہاں دی منظوری ݙتی اتے نہ ای اعجاز مقبول کوں اوہ چیکس وصول کرݨ آکھیے. ایف آئی اے عدالت کوں ݙسایا جو تفصیلی انکوائری کر تے مقدمہ درج کیتا ڳئے جئیں دے دستاویزی ثبوت موجود ہن، اساں بندیاں دی گرفتاری چاہندوں، ٻہوں سارے بندیاں دے اکاؤنٹس اچ براہ راست رقم منتقل تھئی اے، ایں دی ریکوری کیتے بندیاں دی گرفتاری ضروری اے لہذا ضمانت دی ساریاں درخواستاں خارج کیتیاں ونجن. ایں موقع تے اے پی پی انتظامیہ ولوں خرم بیگ ایڈووکیٹ، حسنین حیدر تھہیم اتے روحیل ارشاد رانا عدالت اچ پیش تھیے. روحیل ارشاد رانا آکھیا جو ایں کیس دے سیکشن 34 دے تحت سارے بندے برابر دے شریک ہن، انہاں دی ضمانتاں خارج کیتی ونجن. سماعت ویلھے فاضل جج ہمایوں دلاور پچھیا جو ملزم فرقان راؤ کتھ اے جئیں تے ملزم فرقان راؤ عدالت اچ پیش تھیا. عدالت پچھیا جو تساݙا وکیل کتھاں اے جئیں تے ملزم فرقان راؤ ݙسایا جو انہاں دے وکیل ہائی کورٹ اچ مصروف ہن جئیں پاروں اوہ پیش نی تھی سڳدے. فاضل جج ناراضگی ظاہر کریندے ہوئیں آکھیا جو اے کوئی طریقہ کار نئی میں تساݙی ضمانت خارج کر ݙیساں، تساں وکیل کوں سݙو. سماعت ویلھے ملزم غلام مرتضیٰ دے وکیل ݙسایا جو میݙے موکل دا روڈ ایکسیڈنٹ تھیے، اے اوہدی میڈیکل رپورٹ اتے تصویراں ہن، اوہ کوں حاضری توں استثنی ݙتا ونجے. فاضل جج میڈیکل رپورٹس ݙیکھدے ہوئیں آکھیا جو ہک ای عام پلستر لڳیا ہوئے، ملزم کوں عدالت اچ پیش کرو یا میں اوہدی ضمانت خارج کر ݙیساں. غلام مرتضیٰ دے وکیل آکھیا جو اساں ملزم کوں ویل چیئر تے عدالت اچ پیش کر ݙیسوں جڈانجو ملزم کوں عدالت اچ پیش نی کیتا ڳیا. ملزم خرم شہزاد دے وکیل قاضی عادل ایڈووکیٹ عدالت اچ ایف آئی آر پڑھ تے سنڑائی اتے موقف اختیار کیتا جو ملزم ارشد مجید دے اکاؤنٹ اچ 9 کروڑ روپے، اظہر فاروق دے اکاؤنٹ اچ 8 کروڑ روپے، بشارت عباسی جہڑا وفات پا ڳئے اوندے اکاؤنٹ اچ 3 کروڑ روپے، ملزم غلام مرتضیٰ دے اکاؤنٹ اچ 75 لکھ روپے منتقل تھئے، جہڑے بندیاں دے اکاؤنٹس اچ رقم ڳئی اے، اوہ سارے اکاؤنٹ سیکشن اچ تعینات ہن اتے ارشد مجید منیجر اکاؤنٹس ہا، انہاں ہالی ڈے ان بنک برانچ توں پیسے ٹرانسفر کیتے اتے مجاز اتھارٹی توں منظوری گھنݨ دے بغیر پی ایف فنڈ توں وی رقم ٹرانسفر کیتی. سماعت ویلھے معظم جاوید کھوکھر ولوں ہک جونیئر وکیل پیش تھیا اتے موقف اختیار کیتا جو میݙے وکیل ٻئے عدالت اچ مصروف ہن لہذا سماعت ملتوی کیتی ونجے جئیں تے فاضل جج ریمارکس ݙتے جو اگر وکیل پیش نی تھیا تاں میں معظم جاوید کھوکھر اتے فرقان راؤ دی ضمانت خارج کر ݙیساں. عدالت فریقین دے دلائل مکمل تھیوݨ تے ملزم فرقان راؤ، معظم جاوید کھوکھر، ارشد مجید چوہدری، محمد غواث، اظہر فاروق، خرم شہزاد، ادریس احمد، شاہد لطیف، غلام مرتضیٰ، طاہر گھمن، ساجد علی وڑائچ، عمران منیر اتے سابق ای ڈی عدنان اکرم باجوہ دی ضمانتاں خارج کریندیں ہوئیں انہاں دی گرفتاری دا حکم ݙتا. ایف آئی اے 7 بندے عمران منیر، اظہر فاروق، طاہر گھمن، خرم شہزاد، ادریس چوہدری، ساجد علی وڑائچ اتے غواث خان کوں احاطہ عدالت توں گرفتار کر تے ایف آئی اے منتقل کر ݙتا جڈانجو فرقان راؤ، معظم جاوید کھوکھر، ارشد مجید چوہدری، شاہد لطیف اتے عدنان اکرم باجوہ عدالتی حکم سݨݨ توں پہلے ای عدالت توں فرار تھیوݨ اچ کامیاب تھی ڳئے. عدالت ݙو بندے اعجاز مقبول اتے ثاقب کلیم دی درخواست ضمانت منظور کر ݙتی. واضح رہے جو قومی خبر رساں ادارہ “اے پی پی” انتظامیہ ہک ارب 24 کروڑ روپے دی خورد برد کرݨ دے الزام تے وفاقی تحقیقاتی ادارہ (ایف آئی اے) اچ مقدمہ درج کراوݨ دی درخواست ݙتی ہئی جیندے تے ایف آئی اے مقدمہ درج کرتے کارروائی دا آغاز کیتا ہا.